बिपी राजमार्गमा आज शनिबार राति १२:३० बजेदेखि बिहान ५:०० बजेसम्मका लागि १५ दिनसम्म सवारी आवागमनमा पूर्णरूपमा रोक लगाइने भएको छ।
काभ्रेपलाञ्चोक, सिन्धुली र रामेछाप जिल्लाका प्रमुख सुरक्षा निकायहरूमाझको अन्तरजिल्ला समन्वय समितिको बैठकले बाढीपहिरोको उच्च जोखिमलाई ध्यानमा राख्दै यस्तो निर्णय गरेको हो।
काभ्रेपलाञ्चोकका प्रमुख जिल्ला अधिकारी उमेश ढकालका अनुसार मनसुनका कारण बाढी र पहिरोको जोखिम बढेकाले सुरक्षाका दृष्टिले राजमार्ग रातिको समयमा बन्द गरिने निर्णय गरिएको हो।
उनले भने, “काठमाडौँबाट पूर्वतर्फ जाने सवारीसाधनलाई काभ्रेभञ्ज्याङमा र पूर्वबाट काठमाडौँतर्फ आउने सवारीलाई सिन्धुलीको खुर्कोटमा रोकिनेछ।”
अस्थायी सडकमा हजारौं सवारी आवागमन
गत वर्ष असोजमा आएको बाढीपहिरोले काभ्रेपलाञ्चोकको चौकीडाँडादेखि सिन्धुलीको बर्खेखोलासम्मको करिब ८ किलोमिटर सडक पूर्णरूपमा बगाएको थियो। त्यसपछि सो क्षेत्रमा अस्थायी रुपमा कतै एकतर्फी र कतै दुईतर्फी सवारी सञ्चालनमा ल्याइएको थियो।
पूर्वी नेपाललाई काठमाडौँसँग जोड्ने छोटो र महत्त्वपूर्ण बिपी राजमार्ग दैनिक हजारौं सवारीसाधनको मुख्य मार्ग हो।
भक्तपुर डिभिजन सडक कार्यालयका अनुसार, कुल १६० किलोमिटर लामो राजमार्गमध्ये सिन्धुलीको खुर्कोटदेखि नेपालथोकसम्म ३४ किलोमिटर र नेपालथोकदेखि धुलिखेलसम्म ५० किलोमिटर गरी ८४ किलोमिटर सडक खण्डमा अत्यधिक क्षति पुगेको छ।
डिभिजन कार्यालयले क्षतिग्रस्त राजमार्ग स्थायीरूपमा पुनःनिर्माण गर्न चारवटा खण्डमा ठेक्का प्रक्रिया अगाडि बढाइसकेको जानकारी दिएको छ।