सरकारमा सहभागी नागरिक उन्मुक्ति पार्टीले समर्थन फिर्ता लिएपछि सरकारको स्थायित्वबारे चर्चा तीव्र भइरहेका बेला प्रमुख सत्ता साझेदार नेपाली कांग्रेसका सभापति शेरबहादुर देउवाले स्पष्ट सन्देश दिएका छन्— गठबन्धन पूरै अवधि टिक्नेछ ।
कांग्रेसको केन्द्रीय कार्यसमिति बैठक समापन गर्दै सभापति देउवाले गठबन्धनका विषयमा सञ्चारकर्मीसमक्ष प्रष्ट रूपमा बोलेका हुन् । उनले भने, “कांग्रेस र एमालेबीचको गठबन्धन पाँच वर्ष नै जान्छ, हामी समस्यालाई सँगै बसेर समाधान गर्छौं ।”
उनले संविधान संशोधनको एजेन्डामा पनि यो गठबन्धन अगाडि बढ्ने दाबी गरे । देउवाले प्रधानमन्त्री केपी शर्मा ओलीलाई कुनै आशंका नगर्न सन्देश दिँदै गठबन्धन बलियो रहेको बताए ।
यता, कांग्रेसभित्र भने नेताहरूबीच आन्तरिक विवाद कायम छ । केही नेताहरूले देउवाको नेतृत्वमा सरकार बनाउन जोड दिइरहेका छन् । नेता शेखर कोइराला र केही सदस्यहरूले न्यायालय, अख्तियार र नियुक्ति प्रकरण जोडेर प्रधानमन्त्रीमाथि असन्तोष जनाइरहेका बेला देउवाले ओलीप्रति समर्थन दोहोर्याएका हुन् ।
बैठकमा अधिकांश नेताहरूले प्रधानमन्त्री र मन्त्रीहरूको कार्यशैलीमाथि आलोचना गरे पनि देउवाले त्यसमाथि टिप्पणी गरेनन् । उपसभापति पूर्णबहादुर खड्काले अर्को निर्वाचन देउवाकै नेतृत्वमा हुने संकेत गरे ।
महामन्त्री विश्वप्रकाश शर्माले भने देउवालाई छैटौं पटक प्रधानमन्त्री बन्ने आकांक्षा त्याग्न आग्रह गरे । उनले सभापति पदमा अब प्रतिस्पर्धा नहोस् भन्ने सन्देश दिएका थिए ।
तर देउवाले चितवनमा बोलेका भनाइ दोहोर्याउँदै भने, “संविधान र विधानअनुसार महाधिवेशन हुन्छ, मलाई चित्त बुझे सजिलो, नबुझे अप्ठ्यारो छु, न छोड्ने न लिने, म अप्ठ्यारो मान्छे हुँ ।”
कांग्रेसले क्रियाशील सदस्यता नवीकरण र वितरणमा सुस्तता देखाएको भन्दै महाधिवेशनको ठोस कार्यतालिका तय हुन सकेको छैन । विधान अनुसार २०८२ मंसिरमा कार्यकाल सकिँदैछ । तर १ वर्ष थप गर्न मिल्ने प्रावधानअनुसार अधिकांश नेताहरूले २०८३ भित्र महाधिवेशन गर्न दबाब दिएका छन् ।
महामन्त्री गगन थापाले अब दुई महिनापछि बस्ने केन्द्रीय कार्यसमितिले महाधिवेशनको मिति तय गर्ने जानकारी दिए । उनले असोज मसान्तसम्म क्रियाशील सदस्यताको काम सक्ने र विदेशस्थित जनसम्पर्क समितिलाई साउनमै प्रक्रिया टुंग्याउन निर्देशन दिइएको बताए ।
“२०८२ मंसिरमा महाधिवेशन सम्भव छैन, २०८३ मंसिरभन्दा ढिला कानुनी रूपमा पनि मिल्दैन, चाँडै महाधिवेशन गर्दा आगामी चुनावमा फाइदा हुन्छ,” थापाले भने ।