नवनियुक्त ऊर्जा, जलस्रोत तथा सिँचाइ मन्त्री कुलमान घिसिङले सोमबार पदभार ग्रहण गर्दै आफ्नो पहिलो निर्णयमा डेडिकेटेड र ट्रङ्कलाइनको बक्यौता रकम असुल्न विद्युत प्राधिकरणलाई निर्देशन दिएका छन्।
पहिलो निर्णय
- मन्त्रालय प्रवेश गरेलगत्तै उनले उद्योगहरूले तिर्न बाँकी राखेको विद्युत महसुल उठाउने निर्णयमा हस्ताक्षर गरे।
- मुलुक अहिले आर्थिक र राजनीतिक संकटमा रहेको भन्दै सर्वसाधारण, व्यवसायी र विदेशमा रहेका नेपालीबाट सहयोग आवश्यक रहेको उनको भनाइ थियो।
तबल भत्ता नलिने घोषणा
- मन्त्री घिसिङले आफू मन्त्री पदमा रहँदा पाउने तबल भत्ता नलिने घोषणा गरेका छन्।
- साथै, पाउने सम्पूर्ण पारिश्रमिक विशेष कोषमा दाखिला गर्ने प्रतिबद्धता जनाए।
- उनले भ्रष्टाचार नियन्त्रण र सुशासन कार्यान्वयनलाई प्राथमिकता दिने बताए।
पुनःनिर्माण र कोष स्थापना
- जेन–जी आन्दोलनपश्चात् ध्वस्त भएका संरचनाको छिटो पुनःनिर्माण गर्न अर्थ मन्त्रालयसँग सहमतिमा विशेष कोष स्थापना गरिने उनले बताए।
- सो कोषमा सबै क्षेत्रबाट सहयोग संकलन गर्ने योजना मन्त्री घिसिङको छ।
जेन–जी आन्दोलनको सन्दर्भ
- अन्तरिम सरकार विशेष परिस्थितिमा बनेको भन्दै उनले जेन–जी आन्दोलनका मागलाई सार्थक बनाउन प्रतिबद्ध रहने उल्लेख गरे।
- साथै, तोकिएको समयमा निर्वाचन सम्पन्न गराउनु सरकारले पुरा गर्नुपर्ने मुख्य जिम्मेवारी भएको उनको भनाइ थियो।