प्रतिनिधिसभा विघटनपछि घोषणा गरिएको आगामी फागुन २१ गतेको निर्वाचनलाई लक्षित गर्दै जनमत पार्टी चुनावी मोडमा प्रवेश गरेको छ।
पार्टी अध्यक्ष सीके राउतले केन्द्रीय कार्यकारिणी, संघीय परिषद, प्रदेश समिति र जिल्ला इन्चार्जहरूलाई संगठन परिचालन गर्दै चुनावी तयारी सुरू गर्न निर्देशन दिएका छन्।
राउतले भने:
“चुनाव घोषणा भइसकेको अवस्थामा चुनावमा जानुको विकल्प छैन। अब हामी संगठन परिचालन गरेर तयारीमा लाग्नुपर्छ।”
उनले जेनजी आन्दोलनले ल्याएको राजनीतिक परिवर्तनलाई आत्मसात गर्दै बदलिँदो परिस्थितिअनुसार संगठन सुदृढ गर्नुपर्नेमा जोड दिए।
यद्यपि जनमत पार्टीले अधिकृत रूपमा चुनावमा जाने निर्णय गरेको छैन, तर आगामी बैठकमा यसबारे औपचारिक निर्णय लिने तयारी भइरहेको छ।
राष्ट्रिय उपाध्यक्ष बसन्त कुशवाहाले पनि निर्वाचनको तयारी आवश्यक भएको बताएका छन्। उनले भने:
“संघीयता पक्षधर दलहरूले संसद् पुनःस्थापनाको माग गरे पनि अब चुनावमा जानुको विकल्प छैन।”
कुशवाहाले अन्तरिम सरकारलाई निष्पक्ष चुनावी वातावरण बनाउन आग्रह गर्दै जनमत पार्टीले निर्वाचन प्रक्रियालाई सहयोग गर्ने प्रतिबद्धता जनाए।