चर्चित ब्लकबस्टर **‘जारी’**को सिक्वेल ‘जारी २ : सङ अफ च्याब्रुङ’ अब **कार्तिक ६ गते (भाइटीका)**मा प्रदर्शन हुने भएको छ।
यसअघि सिनेमा संविधान दिवस (असोज ३) मा रिलिज गर्ने तयारी थियो। तर, जेन–जी आन्दोलनका कारण प्रचार–प्रसारका लागि समय अभाव भएकाले प्रदर्शन मिति पर सारिएको निर्देशक उपेन्द्र सुब्बाले जानकारी दिएका छन्।
निर्माण टिमले दुईवटा नयाँ पोस्टर सार्वजनिक गर्दै नयाँ रिलिज मिति घोषणा गरेको हो।
- पहिलो पोस्टरमा मुख्य कलाकार दयाहाङ राई र मिरुना मगरलाई परम्परागत लिम्बु पोशाकमा खुशी मुद्रामा देखाइएको छ।
- दोस्रो पोस्टरमा दयाहाङ र मिरुनासँगै बुद्धि तामाङ र विजय बराललाई पनि समावेश गरिएको छ।
यी पोस्टरले सिनेमा लिम्बु समुदाय र संस्कृतिको कथा वरिपरिको पृष्ठभूमिमा बन्ने संकेत दिएका छन्।
सिनेमामा दयाहाङ, मिरुना, विजय, बुद्धिसहित ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई, सिर्जना निङ्लेखुको अभिनय छ।
सिनेमाको निर्माण बाँसुरी फिल्म्स र कबड्डी फिल्म्सको संयुक्त ब्यानरमा गरिएको हो भने निर्माता रामबाबु गुरुङ, मधु मिजार र जीवन गुरुङ हुन्।
कवि उपेन्द्र सुब्बाको लेखन तथा निर्देशनमा बनेको **‘जारी’ (२०८० साल)**ले नेपाली बक्स अफिसमा १७ करोडभन्दा बढी व्यापार गर्दै ब्लकबस्टरको दर्जा हासिल गरेको थियो। यही कारण सिक्वेल **‘जारी २’**लाई यस वर्षकै प्रतिक्षित सिनेमामध्ये एक मानिएको छ।