सन् १९७५ मा सगरमाथा आरोहण गर्ने पहिलो महिला जुन्को ताबेईको जीवनमा आधारित बायोपिक फिल्म ‘क्लाइम्बिङ फर लाइफ’ को विश्व प्रिमियर ३८ औं टोकियो इन्टरनेसनल फिल्म फेस्टिभलमा गरिएको छ।
फिल्मले ताबेईको साहसिक जीवन, चुनौतीपूर्ण आरोहण र मानव लचिलोपनको कथा प्रस्तुत गरेको छ। निर्देशक जुन्जी साकामोटोले यो फिल्ममा जापानी अभिनेत्री योशिनागा सायुरीलाई मुख्य भूमिकामा ल्याएका छन्।
जापान टाइम्सले फिल्मको समीक्षा गर्दै लेखेको छ, “‘क्लाइम्बिङ फर लाइफ’ हेर्न योग्य बायोपिक हो जसले डरलाई चुनौती दिन्छ र सायुरीको सशक्त अभिनयलाई अझ प्रकाशमा ल्याउँछ।”
फिल्मले ताबेईको जीवनको अन्तिम वर्ष, उनको टर्मिनल क्यान्सर पत्ता लागेपछिको समय, साथै सन् २०११ को ग्रेट इस्ट जापान भूकम्पमा प्रभावित हाई स्कूलका विद्यार्थीको लागि माउन्ट फुजीको यात्राको कथालाई समेटेको छ।
‘क्लाइम्बिङ फर लाइफ’ ताबेईको ऐतिहासिक सगरमाथा आरोहणको ५० औं वार्षिकोत्सव पनि मनाउँछ। निर्देशक साकामोटोका अनुसार फिल्मले “मानव सहिष्णुता र लचिलोपनको झल्को” प्रस्तुत गरेको छ।
फिल्म जापानमा अक्टोबर ३१ बाट थिएटरमा रिलिज हुने तय भएको छ। महोत्सव अक्टोबर २७ देखि नोभेम्बर ५ सम्म चल्नेछ भने फेस्टिभल मार्केट अक्टोबर २९–३१ सम्म सञ्चालन हुनेछ।