ऊर्जा, जलस्रोत तथा सिँचाइमन्त्री दीपक खड्काले संखुवासभाको किमाथांका नाकालाई देशकै एक अत्यन्तै महत्त्वपूर्ण नाका भएको बताएका छन्। शनिबार आयोजित कार्यक्रममा बोल्दै उनले यो नाका १२ महिना सञ्चालनयोग्य भएकोले सरकारको प्राथमिकतामा रहेको स्पष्ट पारे।
चीनसँगको सहकार्य र रणनीतिक महत्व
ऊर्जामन्त्री खड्काले किमाथांका नाकालाई प्रथमिकता दिएर अगाडि बढाइरहेको सरकारको दृष्टिकोणलाई दोहोर्याउँदै भने,
“यो नाकामा चीनको सहयोग प्राप्त हुनेछ। सडक सञ्जालले जोडिएपछि यो नाका पूर्ण रूपमा सञ्चालनमा आउनेछ।”
उनले त्रिदेशीय सम्बन्ध (नेपाल, भारत, चीन) लाई सन्तुलित ढंगले हेर्नुपर्ने आवश्यकता पनि औंल्याए।
भारतको जलविद्युतमा लगानी
खड्काले संखुवासभामा सञ्चालनमा रहेका ठूला जलविद्युत् आयोजनाहरूमा भारत सरकारको लगानी रहेको उल्लेख गर्दै भने,
“छिमेकी दुवै देशसँग सहयोगात्मक सम्बन्ध राख्दै विकास अगाडि बढाउनु आजको आवश्यकता हो।”
सिँचाइ तथा जलस्रोत आयोजनाको उद्घाटन
संखुवासभाको चैनपुरमा सिँचाइ तथा जलस्रोत व्यवस्थापन आयोजना कार्यालयको उद्घाटन गर्दै उनले सो आयोजनाले पानीको स्रोतहरूको दीगो उपयोग गर्दै कृषि उत्पादनमा वृद्धि ल्याउने अपेक्षा व्यक्त गरे।
“स्रोत र साधन हुँदाहुँदै पनि संखुवासभा पछि परेको थियो, अब जनचाहना अनुसार बजेट विनियोजन गरिएको छ।”
उनका अनुसार ऊर्जाको क्षेत्रमा मन्त्रालयले ८० प्रतिशत काम सम्पन्न गरिसकेको छ।