जल तथा मौसम विज्ञान विभाग, मौसम पूर्वानुमान महाशाखाले सोमबार देशका पाँच प्रदेशका केही स्थानमा भारी वर्षाको सम्भावना रहेको चेतावनी दिएको छ।
महाशाखाका अनुसार हाल मनसुनको न्यूनचापीय रेखा सरदर स्थान आसपास सक्रिय रहनुका साथै अरब सागर र बङ्गालको खाडीबाट जलवाष्पयुक्त हावाको प्रभाव देखिएको छ।
दिउँसोको पूर्वानुमान
आज दिउँसो देशभर सामान्यतया बदली रहने र बागमती, गण्डकी, लुम्बिनी, सुदूरपश्चिमलगायत पहाडी भूभागका धेरै ठाउँमा मध्यम वर्षा हुने सम्भावना छ। यस्तै, बागमती, गण्डकी, लुम्बिनी, कर्णाली र सुदूरपश्चिम प्रदेशका एकदुई स्थानमा भारी वर्षा पनि हुनसक्ने महाशाखाले जनाएको छ।
रातिको पूर्वानुमान
आज राति पनि देशभर बदली रहने र कोशी, लुम्बिनी, सुदूरपश्चिम प्रदेशसहित पहाडी भूभागका धेरै ठाउँमा मध्यम वर्षा हुने पूर्वानुमान छ। त्यस्तै, कोशी र सुदूरपश्चिम प्रदेशका केही स्थानमा भारी वर्षाको सम्भावना रहेको छ।
सतर्कता र जोखिम
महाशाखाले निरन्तर वर्षाका कारण पहिरो, डेब्रिज फ्लो (गेग्रान बहाव) र बाढीको जोखिम बढ्ने चेतावनी दिएको छ। ठूला तथा साना नदीनाला र खोलामा पानीको सतह बढ्न सक्ने भएकाले यातायात र जनजीवन प्रभावित हुनसक्ने अनुमान गरिएको छ।
यस कारण सर्वसाधारणलाई सतर्क रहन, सुरक्षित स्थानमा बस्न र आवश्यक पूर्वतयारी गर्न आग्रह गरिएको छ।