यस साताको सेयर बजारमा जलविद्युत् कम्पनीहरू सबैभन्दा बढी कमाउने समूहमा रहन सफल भएका छन्। नेप्से परिसूचक १४.४२ अंकले वृद्धि भई १४० कम्पनीको सेयर मूल्य बढेको छ भने १०८ कम्पनीको सेयर घटेको छ। विशेषतः जलविद्युत्, फाइनान्स, होटल तथा पर्यटन, अन्य र लगानी उपसमूहमा लगानीकर्ताको ध्यान आकर्षित भएको देखिएको छ।
एनपी स्टक्सका अनुसार, जलविद्युत् उपसमूह ५.५१%, फाइनान्स ४.३३%, होटल तथा पर्यटन २.२१%, अन्य १.२३% र लगानी उपसमूह ०.२४% ले बढेको छ। विपरीत रूपमा निर्जीवन बीमा, लघुवित्त, बैंकिङ, विकास बैंक, जीवन बीमा, उत्पादन तथा प्रशोधन र व्यापार उपसमूहमा गिरावट आएको छ।
कमाउने कम्पनीमा जलविद्युत् कम्पनीहरूको वर्चस्व
यस साता सेयर मूल्यमा उच्च वृद्धिको सूचीमा १० कम्पनीमध्ये ९ वटा जलविद्युत् कम्पनी रहेका छन्। बाँकी एक श्री इन्भेस्टमेन्ट फाइनान्स कम्पनी हो। सबैभन्दा बढी वृद्धि पाएको कम्पनी पियोर इनर्जी हो जसको सेयर मूल्य ६०.९८% ले बढेको छ। त्यसपछि क्रमशः बुटवल पावर कम्पनी (२१.०१%), श्री इन्भेस्टमेन्ट फाइनान्स (२०.८०%), सिनर्जी पावर डेभलपमेन्ट (१९.२५%), रिभर फल्स पावर (१८.१४%), चिलिमे हाइड्रोपावर (१६.५६%), युनियन हाइड्रोपावर (१४.७३%), सानीमा माई हाइड्रोपावर (१२.५६%), हिमालयन पावर पार्टनर (१२.०७%) र दोल्ती पावर (११.२७%) रहेका छन्।
सेयर मूल्य गुमाउने कम्पनीहरू
यस साता सबैभन्दा धेरै सेयर मूल्य घट्ने कम्पनी ओम मेगाश्री फर्मास्युटिकल्स हो, जसको सेयर मूल्य १७.२३% ले घटेको छ। अन्य गिरावटमा परेका कम्पनीहरू उपकार लघुवित्त (१३.१५%), भूगोल इनर्जी (१०.४९%), क्रेस्ट माइक्रो लाइफ इन्स्योरेन्स (९.३८%), समाज लघुवित्त (८.३२%), सप्तकोशी विकास बैंक (८.०७%), ग्रिन डेभलपमेन्ट बैंक (७.६७%), दोर्दी खोला जलविद्युत् (६.१२%), एसियन हाइड्रोपावर (५.७१%) र नेपाल माइक्रोइन्स्योरेन्स (५.२५%) रहेका छन्।
कारोबारमा पनि जलविद्युत् कम्पनी अग्रस्थानमा
यो साताको कारोबार रकमका आधारमा पनि जलविद्युत् कम्पनीहरुकै वर्चस्व रह्यो। सबैभन्दा बढी कारोबार राधी विद्युत् कम्पनीको भयो, जसको कुल कारोबार २ अर्ब ९७ करोड ७९ लाख रुपैयाँ पुगेको छ। त्यसपछि क्रमशः ङादी ग्रुप पावर (२ अर्ब ८६ करोड), सानिमा माई हाइड्रोपावर (२ अर्ब ४८ करोड), युनिभर्सल पावर कम्पनी, बुटवल पावर, अरुण काबेली पावर, एनआरएन इन्फ्रास्ट्रक्चर, चिलिमे हाइड्रोपावर, सीईडीबी होल्डिङ्स र अरुण भ्याली हाइड्रोपावर रहेका छन्।
बजार पुँजीकरणमा २४ अर्बको वृद्धि
पाँच दिनको कारोबार अवधिमा कुल ५० अर्ब ४१ करोड रुपैयाँको कारोबार भएको छ। नेप्से परिसूचकको वृद्धिसँगै बजार पुँजीकरण २४ अर्ब २ करोड रुपैयाँले बढेर ४४ खर्ब २३ अर्ब ३ करोड पुगेको छ। बजार पुँजीकरणमा वृद्धिको अर्थ लगानीकर्ताको सम्पत्तिमा वृद्धि भएको हो।