नेपाल राष्ट्र बैंकले दुई चर्चित डिजिटल पेमेन्ट सेवा प्रदायक कम्पनी पेवेल नेपाल र सजिलो पे पेमेन्ट को पेमेन्ट सेवा सञ्चालन अनुमति खारेज गरेको छ।
राष्ट्र बैंकका अनुसार यी कम्पनीहरूले विद्यमान कानुनविपरीत कार्य गर्दै आएका कारण अनुमति खारेज गरिएको हो। विशेष रूपमा, अवैध सुन कारोबारमा संलग्नता र त्यसको भुक्तानीमा सहजीकरण गरेको प्रमाण भेटिएपछि यो निर्णय गरिएको हो।
गत वर्ष असार महिनामा, नेपाल प्रहरीको केन्द्रीय अनुसन्धान ब्युरो (CIB) ले पत्रकार सम्मेलनमार्फत यी कम्पनीहरूले अवैध सुन कारोबारमा डिजिटल माध्यमबाट रकम कारोबारमा सहजीकरण गरेको खुलासा गरेको थियो। त्यसपछि सुरु गरिएको अनुसन्धानको निष्कर्षअनुसार दुबै कम्पनी दोषी देखिएपछि राष्ट्र बैंकले कडा कारबाही स्वरूप लाइसेन्स खारेज गर्ने निर्णय लिएको हो।
राष्ट्र बैंकको कडाइ डिजिटल कारोबारको पारदर्शिताको लागि संकेत हो
वर्तमान समयमा डिजिटल कारोबारको उपयोग अत्यधिक बढ्दै गएको छ। त्यस्ता अवस्थामा पारदर्शिता, नियमको पालना र भरोसायोग्य सेवा अत्यावश्यक हुन्छ। राष्ट्र बैंकको यो निर्णयले अरु डिजिटल सेवा प्रदायकलाई पनि कानुनी दायराभित्र रही कार्य गर्न प्रेरणा दिने विश्वास गरिएको छ।