प्रधानमन्त्री सुशीला कार्की र राष्ट्रिय प्रजातन्त्र पार्टी (राप्रपा)का शीर्ष नेताहरूबीच आइतबार बालुवाटारमा भेटवार्ता सम्पन्न भएको छ। आगामी प्रतिनिधिसभा निर्वाचन, हालको राजनीतिक वातावरण तथा सम्भावित समाधानका विषयमा दुवै पक्षबीच विस्तृत छलफल भएको राप्रपा स्रोतले जनाएको छ।
राप्रपाको सुझाव : राजासहित सर्वपक्षीय संवाद आवश्यक
राप्रपा अध्यक्ष राजेन्द्र लिङ्देनले देशका विद्यमान चुनौती समाधान गर्न राजा, राजनीतिक दल, जेनजी तथा सरोकारवालाहरूबीच सर्वपक्षीय संवाद अपरिहार्य भएको बताएका छन्।
उनका अनुसार यस्तो पहलले देशलाई “दीर्घकालीन स्थिरता र सहज निर्वाचन वातावरण” बनाउन मद्दत पुर्याउँछ।
लिङ्देनले प्रधानमन्त्री कार्कीलाई सरकार गठनको मूल उद्देश्य नै समस्याबाट देशलाई निकास दिई निष्पक्ष निर्वाचन गराउनु रहेको स्मरण गराएका थिए।
विदेशमा रहेका नेपालीलाई भोटाधिकार दिनुपर्ने राप्रपाको जोड
अध्यक्ष लिङ्देनले यसै आगामी निर्वाचनमार्फत विदेशमा बस्ने नेपालीहरूलाई भोटिंग राइट दिने व्यवस्था मिलाउन आग्रह गरे।
राप्रपाले लामो समयदेखि उठाउँदै आएको यो मुद्दा यसपटक कार्यान्वयन योग्य अवस्थामा पुगेको उनको तर्क छ।
जेनजी आन्दोलनमा गरिएको कारबाहीप्रति आपत्ति
लिङ्देनले सहभागीहरूलाई गिरफ्तार गरी कारबाही गरिएको भन्दै जेनजी आन्दोलनप्रति सरकारले गरेको व्यवहारप्रति असन्तुष्टि जनाए।
अभिव्यक्ति स्वतन्त्रतामाथि अंकुश लगाउने प्रयास कुनै पनि रूपमा स्वीकार्य नभएको उनको भनाइ छ।
मंसिर २३ मा राप्रपाको ध्यानाकर्षण सभा
राप्रपाले मंसिर २३ गते काठमाडौंमा ठूलो ध्यानाकर्षण सभा आयोजना गर्ने तयारी गरिरहेको छ।
यो सभामार्फत पार्टीले
- वर्तमान सरकारका कमजोरी,
- निर्वाचन तयारी,
- संविधान कार्यान्वयन,
- राष्ट्रवाद र पहिचानका मुद्दा
बारे सार्वजनिक रूपमा आफ्नो धारणा राख्ने बताइएको छ।