तीनकुनेमा भएको हिंसात्मक प्रदर्शनमा संलग्न रहेको आरोपमा राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र आज काठमाडौं जिल्ला अदालतमा उपस्थित भएका छन्। आज न्यायाधीश तारादेवी महर्जनको इजलासमा मिश्रमाथिको थुनछेक बहस हुने तय भएको छ। यस बहसपछि उनी पूर्वपक्ष थुनामा राखिने कि नराखिने निर्णय हुनेछ।
तीनकुने घटनासँग सम्बन्धित अभियोगमा मिश्रमाथि राज्यविरुद्धको कसुर, आपराधिक उपद्रव, संगठित अपराध, र एकीकृत कसुर अन्तर्गत मुद्दा दर्ता भएको हो।
यसै घटनाका अर्का अभियुक्त राप्रपाका महामन्त्री शवल शमशेर राणा भने सोमबार साँझ ३ लाख रुपैयाँ धरौटीमा रिहा भइसकेका छन्। उता, प्रदर्शनका योजनाकार मानिएका दुर्गा प्रसाईंलाई कारागार चलान गरिसकिएको छ।
तीनकुनेको उक्त प्रदर्शनलाई राजावादी समूहद्वारा हिंसात्मक ढंगमा आयोजना गरिएको आरोप लगाइएको थियो। घटनासँग सम्बन्धित अन्य अभियुक्तहरूमाथि समेत अनुसन्धान जारी रहेको प्रहरीले जनाएको छ।