घटस्थापनाको दिन सार्वजनिक बिदा भए पनि बैंकिङ कारोबारका लागि ‘रियल टाइम ग्रस सेटलमेन्ट’ (आरटिजिएस) प्रणाली खुला रहने भएको छ।
नेपाल राष्ट्र बैंकका अनुसार, सोमबार घटस्थापनाको दिन आरटिजिएस प्रणाली बिहान १० बजेदेखि अपराह्न ४ बजेसम्म सञ्चालन हुनेछ। यस प्रणालीमार्फत बैंकहरू ठूलो मूल्य र अति जरुरी भुक्तानीको कारोबार सजिलै गर्न सक्नेछन्।
आरटिजिएस प्रणाली विद्युतीय भुक्तानी प्रणाली हो, जसबाट खासगरी उच्च मूल्यका र तत्काल आवश्यकता पर्ने भुक्तानीहरू तुरुन्तै सम्पन्न गरिन्छ। राष्ट्र बैंकले सो अवसरमा सबै बैंकिङ सेवा प्रदायक र कारोबारमा संलग्न पक्षलाई सूचित गरेको छ।