संघीय लोकतान्त्रिक गणतन्त्र नेपालको संविधान जारी भएको १० वर्ष पूरा भएको अवसरमा शुक्रबार राजधानीको टुँडिखेलस्थित सैनिक मञ्चमा विशेष समारोह आयोजना गरियो।
२०७२ साल असोज ३ गते तत्कालीन संविधान सभाबाट संघीय संरचनासहितको नयाँ संविधान जारी भएको थियो। त्यसै दिनलाई सम्झिँदै हरेक वर्ष असोज ३ गते संविधान दिवसको रुपमा मनाइन्छ।
उच्च पदाधिकारीहरूको उपस्थिति
संविधान दिवस मूल समारोह समितिद्वारा आयोजित समारोहमा राष्ट्रपति रामचन्द्र पौडेल, उपराष्ट्रपति रामसहाय प्रसाद यादव, अन्तरिम सरकारकी प्रधानमन्त्री सुशीला कार्की, प्रधानन्यायाधीश, सभामुख, राष्ट्रियसभा अध्यक्षलगायत उच्च पदाधिकारीहरूको उपस्थिति रहेको थियो।
सैनिक मञ्चमा विशेष प्रस्तुति
समारोहमा नेपाली सेना, सशस्त्र प्रहरी र नेपाल प्रहरीका जवानहरूले आकर्षक मार्चपास प्रदर्शन गरे। साथै, शान्तिको प्रतीकका रुपमा परेवा उडाइयो। यद्यपि, मुलुकको वर्तमान विशेष परिस्थितिलाई मध्यनजर गर्दै यसपटक झाँकी प्रदर्शनजस्ता सांस्कृतिक कार्यक्रम भने स्थगन गरिएको थियो।
संविधान दिवसको ऐतिहासिक पृष्ठभूमि
सङ्घीय लोकतान्त्रिक गणतन्त्र नेपालका प्रथम राष्ट्रपति डा. रामवरण यादवले २०७२ साल असोज ३ गते ‘नेपालको संविधान २०७२’ जारी भएको घोषणा गरेका थिए। संविधान जारी भएको दिनलाई नेपालले राष्ट्रिय दिवसको रुपमा स्थापित गरेको हो।