सर्वोच्च अदालतले माइती वा दाइजो स्वरूप पाएको सम्पत्ति वा जुनसुकै स्रोतबाट आर्जित सम्पत्तिमा सौतेनी छोराले पनि समान अंश पाउने फैसला गरेको छ ।
न्यायाधीश डा. नहकुल सुवेदी, टेकप्रसाद ढुंगाना र बालकृष्ण ढकालको पूर्ण इजलासले अंशबन्डा सम्बन्धी मुद्दामा सौतेनी आमाले आर्जित सम्पत्तिमा सौतेनी छोराको हक कायम हुने निर्णय गरेको हो । सर्वोच्चले ‘आमा’ शब्दमा सौतेनी आमा र ‘छोरा’ शब्दमा सौतेनी छोरासमेत समेटिएको व्याख्या गरेको छ ।
फैसला अनुसार, बाबुआमा वा पत्नीले जुनसुकै स्रोतबाट प्राप्त सम्पत्ति छोराछोरी र पत्नीका लागि पैतृक सम्पत्ति मानिन्छ र त्यसमा बन्डा लाग्नेछ । यसैगरी, डीएनए परीक्षण अनिवार्य नभएको स्पष्ट पार्दै अदालतले नाता पुष्टि गर्न अन्य प्रमाण पर्याप्त हुन सक्ने बताएको छ ।
सर्वोच्चले शशि पराजुली उप्रेतीविरुद्ध राहुल पराजुली र तुलसा बस्नेतको अंशबन्डा मुद्दामा फैसला सुनाएको हो । यसमा सर्वोच्चले नवराज पराजुलीकी जेठी पत्नी तुलसा, कान्छी पत्नी शशि, जेठी तुलसाबाट जन्मेका राहुल र कान्छी शशिबाट जन्मेका तीन छोराले ७ भागको २ भाग अंश पाउने ठहर गरेको छ ।
सर्वोच्चले बकसस्वरूप आमाबाट प्राप्त सम्पत्ति पनि पैतृक सम्पत्तिसरह हुने र बन्डा लाग्ने व्याख्या गरेको छ । फैसलाको पूर्ण पाठ बिहीबार सार्वजनिक भएको हो र सर्वोच्चले काठमाडौं जिल्ला अदालत र उच्च अदालतको फैसला सदर गरेको छ ।