वैदेशिक रोजगारीको प्रलोभनमा “युके पठाइदिन्छु” भन्दै रकम ठगी गरेको आरोपमा एक जनालाई प्रहरीले पक्राउ गरेको छ ।
इडियु सर्च नेपाल, बानेश्वरका सञ्चालक वसन्त कार्की (२९) लाई बिहीबार पक्राउ गरिएको हो। वसन्त कार्की ललितपुर महालक्ष्मी–२ बस्ने, कास्की पोखरा–१४ घर भएका छन्।
पक्राउको आधार पीडितहरूको उजुरी हो । उनले ८ जना पीडितबाट ४३ लाख रुपैयाँ लिई सम्पर्कविहीन भएका थिए । प्रहरीले काठमाडौं उपत्यका अपराध अनुसन्धान कार्यालयबाट खटिएको टोलीले उनलाई काठमाडौं–१० बाट पक्राउ गरेको हो ।
उनलाई आवश्यक अनुसन्धान र कारबाहीका लागि वैदेशिक रोजगार विभागमा पठाइएको छ ।