अमेरिकाका पूर्वराष्ट्रपति डोनाल्ड ट्रम्प र टेस्ला तथा स्पेसएक्सका प्रमुख एलन मस्कबीचको सम्बन्ध मात्र पाँच महिनामै टुटिएको छ। पछिल्ला दिनमा यी दुईबीच सामाजिक सञ्जालमार्फत आरोप-प्रत्यारोप र गालीगलौज खुलेर सार्वजनिक भइरहेका छन्।
राष्ट्रपति कार्यालयमा प्रमुख सल्लाहकारको रूपमा मस्कले केही समयसम्म ट्रम्पको समर्थन गरेका थिए। तर, अमेरिकी संसद्को तल्लो सदन ‘हाउस अफ रिप्रजेन्टेटिभ्स’ बाट पास भएको कर तथा खर्चसम्बन्धी विधेयकप्रति मस्क असन्तुष्ट भएपछि ट्रम्पविरुद्ध खुलेर उत्रिएका हुन्। उनले उक्त विधेयकलाई “घिनलाग्दो” भन्दै यसको कडा आलोचना गरेका थिए।
ट्रम्पको धम्की र मस्कको चेतावनी
राष्ट्रपति ट्रम्पले जवाफमा मस्कलाई दिइएको अर्बौं डलरको सब्सिडी र सरकारी सम्झौताहरू रद्द गर्ने चेतावनी दिएका छन्। उनले सामाजिक सञ्जालमार्फत भने, “बजेट जोगाउने सबैभन्दा सजिलो उपाय मस्कलाई दिइने अनावश्यक फन्डिङ रोक्नु हो।”
मस्कले पनि कडा प्रतिक्रिया दिँदै ट्रम्पविरुद्ध महाभियोगको चेतावनी दिए। साथै उनले ट्रम्पको नाम कुख्यात बाल यौन अपराधी जेफ्री एपस्टिनसँग जोडिएको दाबी गर्दै सार्वजनिक आरोप लगाएका छन्।
सम्बन्ध बिग्रिएपछि असर सेयर बजारमा
ट्रम्प र मस्कबीचको यो विवादले विश्व सेयर बजारमा असर पारेको छ। टेस्लाको सेयर मूल्य एकैदिन १४.३ प्रतिशतले घट्दा कम्पनीको बजार मूल्य १५० अर्ब डलरले घटेको छ। यसले गर्दा टेस्ला विश्वकै शीर्ष १० कम्पनीको सूचीबाट बाहिरिएको छ।
मस्कको सम्पत्तिमा मात्र ३४ अर्ब डलरको गिरावट आएको बताइएको छ। यो गिरावट ट्रम्प प्रशासनको बजेट विधेयकविरुद्ध मस्कले एक्स (पूर्व ट्विटर) मा पोस्ट गरेका तीव्र आलोचनापछि आएको हो।
राजनीतिक दूरी र व्यक्तिगत आरोप
पहिले ट्रम्पको नजिक मानिने मस्क अहिले खुलेर विरोधमा उत्रिएका छन्। मस्कले ट्रम्प सरकारको “घातक नीति” र बजेट विधेयकको आलोचना गर्दै आफ्ना अनुयायी र सांसदहरूलाई त्यसको विरोध गर्न आह्वान गरेका छन्।
ट्रम्पले पनि मस्कलाई “स्वार्थी” भन्दै, “जबसम्म स्वार्थ थियो, तबसम्म साथ थियो। अहिले हाम्रो खर्च कटौती गर्दा उनी रोइकराइ गरिरहेका छन्,” भनी टिप्पणी गरेका छन्।
ट्रम्पका पूर्वसल्लाहकार स्टिभ बेननले मस्कमाथि देशनिकालाको माग गर्दै उनको कम्पनी कब्जा गर्नुपर्ने अभिव्यक्ति दिएका छन्। रिपब्लिकन पार्टी पनि मस्कसँग दूरी बढाउँदै गएको देखिन्छ।
लागूऔषध आरोप र व्यक्तिगत आलोचना
न्युयोर्क टाइम्सले केही दिनअघि मस्कले किटामाइन जस्ता लागूऔषधको अत्यधिक सेवन गरिरहेको समाचार प्रकाशित गरेको थियो। उनले ट्रम्प सरकारमा काम गरिरहँदा पनि सार्वजनिक समारोहमा असामान्य व्यवहार देखिएको भन्दै आलोचना भएको छ।