नेकपा (माओवादी केन्द्र) का पार्टी उपमहासचिव जनार्दन शर्माले आत्मालोचना गर्न अस्वीकार गरेपछि पार्टीले उक्त विषयलाई सर्कुलरमार्फत तल्ला कमिटीलाई जानकारी गराएको छ।
अध्यक्ष पुष्पकमल दाहाल र महासचिव देवप्रसाद गुरुङले हस्ताक्षर गरेको सर्कुलरमा जनार्दन शर्माले अध्यक्ष दाहालमाथि निराधार आरोप लगाएको उल्लेख छ। सर्कुलरमा भनिएको छ, ‘स्थायी समितिका सदस्यहरूले दिएको सुझाव र आलोचना आत्मसात् गरेर कमजोरी सच्याउन अध्यक्षले विशेष आग्रह गर्नुभएको थियो। तर, कमरेड प्रभाकरले माइन्यूटमा हस्ताक्षर नगरेको विषय बाहेक अन्य विषयमा आत्मालोचना गर्नुभएन र पार्टी नेतृत्वविरुद्ध निराधार आरोप लगाउनुभयो।’
पार्टीले स्थायी समितिको बैठकले प्रभाकरलाई कडा आलोचनासहित भविष्यमा त्यस्ता अभिव्यक्ति र गतिविधि नगर्न निर्देशन दिने निर्णय गरेको जानकारी दिएको छ। साथै, पार्टीभित्र भिन्न मत भए पनि विधिसम्मत छलफल गर्ने स्वतन्त्रता रहने विश्वाससमेत व्यक्त गरिएको छ।
यसअघि स्थायी समितिको बैठकमा फरक मत राख्दै शर्माले नेतृत्वका प्रति प्रश्न उठाएका थिए। बैठकको अन्त्यमा अध्यक्ष दाहालले शर्मालाई आत्मालोचनाका लागि आग्रह गरेका थिए, तर उनले पार्टी र आन्दोलनमा आफ्नो हात नरहेको भन्दै आत्मालोचना गर्न अस्वीकार गरेका थिए।